Кыргызча:

Кыргыз Республикасынын Финансы министрлигинин Коллегиясы Баалуу металлдар департаментинин Өнүгүү стратегиясын жактырды

2026-жылдын 14-июлунда Кыргыз Республикасынын Финансы министри Руслан Мырзабекович Суйналиевдин төрагалыгы астында Кыргыз Республикасынын Финансы министрлигинин коллегиясынын отуруму болуп өттү.

Отурумдун жүрүшүндө 2026-жылдын биринчи жарым жылдыгындагы Кыргыз Республикасынын республикалык бюджетинин аткарылышынын жыйынтыктары каралды. Күн тартибиндеги негизги маселелер менен катар, Кыргыз Республикасынын Финансы министрлигине караштуу Баалуу металлдар департаментинин директору А.А. Кадыракунов Департаменттин 2026–2029-жылдарга карата Өнүгүү стратегиясынын долбоорун сунуштады.

Баяндаманын жүрүшүндө баалуу металлдар жана баалуу таштар чөйрөсүндөгү мамлекеттик башкарууну өркүндөтүүгө, тармакты санариптештирүүгө, инфраструктураны модернизациялоого жана мамлекеттик жөнгө салуунун натыйжалуулугун жогорулатууга багытталган Департаментти өнүктүрүүнүн негизги багыттары көрсөтүлдү.

Кароонун жыйынтыгы боюнча Кыргыз Республикасынын Финансы министрлигинин Коллегиясы сунушталган Стратегиянын долбоорун жактырды жана Департаментке аны белгиленген тартипте ишке ашырууну камсыз кылууну тапшырды.