Жазгы жолугушууларга катышуу жана жаңы демилгелер жөнүндө.
Кыргыз Республикасынын Финансы министрлигине караштуу Баалуу металлдар департаментинин директору Кадыракунов Алмаз Асанакунович Эл аралык валюта фондунун жана Дүйнөлүк банк тобунун Жазгы жолугушууларына катышты, анда глобалдык финансылык туруктуулуктун, туруктуу өнүгүүнүн жана дүйнөлүк экономикадагы кризистик көрүнүштөргө чара көрүүнүн негизги маселелери талкууланды.
Жолугушуулардын алкагында кыргыз тарап, өзгөчө финансы рынокторунун туруксуздугу, инфляциялык басым жана геосаясий тобокелдиктер өсүп жаткан шартта, улуттук экономикалардын туруктуулугун жогорулатууга карата системалуу мамилелерди иштеп чыгуу зарылдыгына басым жасады.
Кадыракунов Алмаз Асанакунович Кыргыз Республикасынын макроэкономикалык туруктуулугун жана финансылык коопсуздугун камсыз кылуунун стратегиялык куралдарынын бири катары баалуу металлдар чөйрөсүндөгү мамлекеттик саясатты калыптандыруу жана киргизүү демилгеси менен чыкты.
Сүйлөшүүлөрдүн жүрүшүндө баалуу металлдар, биринчи кезекте алтын, салттуу түрдө коргоочу активдин функциясын аткарары жана мамлекеттик резервдерди диверсификациялоонун, тышкы карыз алуулардан көз карандылыкты азайтуунун жана суверендүү финансылык туруктуулукту бекемдөөнүн натыйжалуу механизми боло алары белгиленди.
Төмөнкү багыттарга өзгөчө көңүл бурулду:
- баалуу металлдардын мамлекеттик фондун калыптандыруу;
- баалуу металлдардын жана буюмдардын ички рыногун өнүктүрүү;
- баалуу металлдардын жүгүртүлүшүн эсепке алуунун жана контролдоонун айкын жана санариптик системасын түзүү;
- кризистик шарттарда карыздык милдеттенмелерди камсыздоо куралы катары алтынды пайдалануу.
Бул чөйрөдөгү мамлекеттик саясатты институционалдык жактан бекемдөө, ошондой эле техникалык жана консультациялык колдоо көрсөтүү маселелери боюнча эл аралык финансы институттары менен координациялоо зарылдыгы өзүнчө баса белгиленди.
Кыргыз Республикасынын демилгелери экономикалык туруктуулуктун жаңы механизмдерин калыптандырууга карата проактивдүү мамиленин мисалы катары жолугушуулардын катышуучуларынын кызыгуусун жаратты.
Жазгы жолугушууларга катышуу эл аралык кызматташтыкты бекемдөөгө, улуттук артыкчылыктарды көрсөтүүгө жана стратегиялык ресурстарды башкаруунун заманбап ыкмаларын калыптандырууда Кыргыз Республикасынын ролун белгилөөгө мүмкүндүк берди.
